കോല്‍ക്കത്ത: ഹരിയാനയില്‍ കര്‍ഷകര്‍ക്കു നേരെ നടന്ന പോലീസ് നടപടിയില്‍ അപലപിച്ച്‌ പശ്ചിമ ബംഗാള്‍ മുഖ്യമന്ത്രി മമത ബാനര്‍ജി. ബിജെപി കര്‍ഷകരുടെ ഉപജീവനമാര്‍ഗം തട്ടിയെടുക്കുകയും അവരുടെ അവകാശങ്ങള്‍ ഇല്ലാതാക്കാന്‍ ശ്രമിക്കുകയുമാണെന്ന് മമത പറഞ്ഞു. ഡല്‍ഹിയിലെ കര്‍ഷക പ്രതിഷേധത്തില്‍ പങ്കുചേരാന്‍ തയാറാണെന്ന് മമത വ്യക്തമാക്കി.
ഹരിയാനയിലെ സംഭവവികാസങ്ങള്‍ ദൗര്‍ഭാഗ്യകരമാണ്. എല്ലാ ജനാധിപത്യ, മൗലിക അവകാശങ്ങളും ഇല്ലാതാക്കാന്‍ ശ്രമിക്കുന്ന കേന്ദ്രസര്‍ക്കാര്‍ ഇതാദ്യമാണ്. കര്‍ഷകരുടെ ജനാധിപത്യാവകാശങ്ങള്‍ കവരാന്‍ കേന്ദ്രത്തിനു കഴിയില്ലെന്നും. രാഷ്ട്രം എല്ലാവരുടേതുമാണ്. സ്വാതന്ത്ര്യസമരത്തില്‍ ബിജെപിയുടെ പങ്ക് എന്തായിരുന്നു? രാജ്യത്തിന് സ്വാതന്ത്ര്യം ലഭിച്ചു. നിങ്ങളുടെ ചില നേതാക്കള്‍ സ്വാതന്ത്ര്യ സമരത്തെ ഒറ്റിക്കൊടുത്തിട്ടുണ്ട്. ബിജെപിയുടെ യഥാര്‍ഥ മുഖം ഇതാണെന്നും മമത കൂട്ടിച്ചേര്‍ത്തു.
