0
0
കൊച്ചി: തൊഴില്‍തട്ടിപ്പ് കേസില്‍ സരിത നായര്‍ക്കെതിരെ ഗുരുതര ആരോപണവുമായി ഒന്നാം പ്രതി രതീഷ്. തൊഴില്‍ തട്ടിപ്പില്‍ സരിത മുഖ്യ കണ്ണിയെന്ന് ഹൈകോടതിയില്‍ സമര്‍പ്പിച്ച ജാമ്യാപേക്ഷയില്‍ രതീഷ് ചൂണ്ടിക്കാട്ടുന്നു. പണം കൈമാറിയത് സരിതയുടെ അക്കൗണ്ടിലേക്കാണ്. വ്യാജ നിയമന ഉത്തരവുകള്‍ നല്‍കിയതും സരിതയാണെന്നും രതീഷ് പറയുന്നു.
ഷൈജുവും സരിതയും തമ്മില്‍ സാമ്ബത്തിക ഇടപാടുകള്‍ ഉണ്ടായിരുന്നു. അതിന്‍റെ ഭാഗമായിട്ടാണ് തട്ടിപ്പ് ആസൂത്രണം ചെയ്തത്. ഷൈജുവിനാണ് കൂടുതല്‍ പണം ലഭിച്ചത്. അത് സരിതക്ക് കൈമാറിയിട്ടുണ്ട്. പണം നല്‍കിയിട്ടും ജോലി ലഭിക്കാന്‍ വൈകുന്നതിനെ കുറിച്ച്‌ ചോദിച്ചപ്പോള്‍ സരിതയാണ് വ്യാജ നിയമന ഉത്തരവുകള്‍ നല്‍കിയത്. പലതരം സാങ്കേതിക പ്രശ്നങ്ങള്‍ ചൂണ്ടിക്കാട്ടി ജോലിയില്‍ പ്രവേശിക്കുന്നതില്‍ നിന്ന് ഉദ്യോഗാര്‍ഥികളെ തടഞ്ഞു.
എന്നാല്‍, ജോലി അല്ലെങ്കില്‍ പണം എന്ന നിലപാടിലേക്ക് ഉദ്യോഗാര്‍ഥികള്‍ സ്വീകരിച്ചതോടെയാണ് മൂന്നു ലക്ഷം രൂപയുടെ ചെക്ക് പരാതിക്കാരന്‍ അരുണിന് സരിത നല്‍കിയതെന്നും കുന്നത്തുകാല്‍ പഞ്ചായത്തിലെ സി.പി.ഐ അംഗമായ രതീഷ് പറയുന്നു. മൂന്നു ലക്ഷം നല്‍കുന്നതിന് സരിത നല്‍കിയ ചെക്കും ജാമ്യാപേക്ഷയോടൊപ്പം കോടതിയില്‍ ഹാജരാക്കിയിട്ടുണ്ട്.
ബിവറേജസ് കോര്‍പറേഷനിലും കെ.ടി.ഡി.സിയിലും ജോലി വാഗ്ദാനം നല്‍കി ലക്ഷങ്ങള്‍ വാങ്ങി ഇരുപതോളം യുവാക്കള്‍ക്ക് വ്യാജ നിയമന ഉത്തരവുകള്‍ നല്‍കി എന്നാണ് സരിതക്കെതിരെ നെയ്യാറ്റിന്‍കര പൊലീസ് രജിസ്റ്റര്‍ ചെയ്‌ത കേസ്. 11 ലക്ഷം തട്ടിയെന്ന ഓലത്താന്നി സ്വദേശി അരുണിന്‍റെ പരാതിയില്‍ സരിത നായരെ രണ്ടാം പ്രതിയാക്കി നെയ്യാറ്റിന്‍കര പൊലീസ് കേസെടുത്തിരുന്നു. ഇടനിലക്കാരായി പ്രവര്‍ത്തിച്ച കുന്നത്തുകാല്‍ പഞ്ചായത്തിലെ ഇടത് സ്ഥാനാര്‍ഥി രതീഷ്, ഷാജി പാലിയോട് എന്നിവരും കേസില്‍ പ്രതികളാണ്.
മന്ത്രി കടകംപള്ളി സുരേന്ദ്രന്‍ അടക്കം ഒപ്പിട്ട വ്യാജ നിയമന ഉത്തരവ് നല്‍കിയാണ് തട്ടിപ്പ് നടത്തിയതെന്നാണ് വിവരം. കഴിഞ്ഞ നവംബറില്‍ കെ.ടി.ഡി.സിയില്‍ ജോലി വാഗ്ദാനം ചെയ്ത് അഞ്ച് ലക്ഷം തട്ടിയെടുത്തതായി പാലിയോട് സ്വദേശി നെയ്യാറ്റിന്‍കര പൊലീസില്‍ പരാതി നല്‍കിയിരുന്നു. ഈ പരാതിയില്‍ അന്വേഷണം പുരോഗമിക്കവെയാണ് അരുണിന്‍റെ പരാതി ലഭിച്ചത്. തമിഴ്നാട്ടില് താമസിക്കുന്ന സരിത എന്ന യുവതിയുടെ തിരുെനല്‍വേലിയിലെ ബാങ്ക് അക്കൗണ്ടിലേക്കാണ് പണം കൈമാറിയത്.
നെയ്യാറ്റിന്‍കരയില തൊഴില്‍ തട്ടിപ്പിന് ഇരയായ യുവാവുമായുള്ള സരിതയുടേതെന്ന് കരുതുന്ന പുതിയ ശബ്ദരേഖ ഏതാനും ദിവസം മുമ്ബ് പുറത്തുവന്നിരുന്നു. സി.പി.എമ്മിന് തന്നെ പേടിയാണെന്നും പിന്‍വാതില്‍ നിയമനം പാര്‍ട്ടി ഫണ്ടിനാണെന്നും സരിത ശബ്ദരേഖയില്‍ അവകാശവാദം ഉന്നയിക്കുന്നുണ്ട്.
”ഒരുവീട്ടില്‍ ഒരാള്‍ക്ക് ജോലികൊടുത്താല്‍ വീട്ടുകാര്‍ മൊത്തം കൂടെനില്‍ക്കുമെന്ന് സി.പി.എം കരുതുന്നുണ്ട്. അതുവഴി അവര്‍ക്ക് പാര്‍ട്ടിഫണ്ട് സ്വരൂപിക്കുകയും ചെയ്യാം. എന്നെ അവര്‍ക്ക് ചെറുതായി പേടിയുണ്ട്്. അത് ഞാന്‍ യൂസ് ചെയ്യുകയാണ്” -സരിത ശബ്ദരേഖയില്‍ പറയുന്നു.
ആരോഗ്യകേരളം പദ്ധതിയില്‍ നാലുപേര്‍ക്ക് ജോലി നല്‍കിയെന്ന് ശബ്ദരേഖയില്‍ സരിത പറഞ്ഞിരുന്നു. പരാതിക്കാരനായ അരുണുമായുള്ള സംഭാഷണമാണ് പുറത്തുവന്നത്. പിന്‍വാതില്‍ നിയമനത്തില്‍ ഉദ്യോഗസ്ഥര്‍ക്കും രാഷ്ട്രീയക്കാര്‍ക്കും പങ്കുണ്ടെന്നും ശബ്ദരേഖയില്‍ പറഞ്ഞിരുന്നു.
