0
0
ദേശീയപാതയിലെ ടോള്‍ പ്ലാസകളില്‍ ഇന്ന് മുതല്‍ ഫാസ്ടാഗ് നിര്‍ബന്ധമാക്കി. ഇതോടെ മൂന്നുതവണയായി നീട്ടിനല്‍കിയ ഇളവ് അവസാനിച്ചു. ഫാസ്ടാഗില്ലാത്ത വാഹനങ്ങള്‍ ഇനി മുതല്‍ ഇരട്ടിത്തുക നല്‍കിയാല്‍ മാത്രമേ ടോള്‍ കടന്നുള്ള യാത്ര സാധ്യമാകു.
അതേസമയം, ഫാസ്ടാഗ് ഇല്ലാതെ എത്തിയ കെഎസ്‌ആര്‍ടിസി വാഹനത്ത കുമ്ബളം ടോള്‍ പ്ലാസയില്‍ തടഞ്ഞതിനെ തുടര്‍ന്ന് യാത്രക്കാര്‍ ദുരിതത്തിലായി. കെഎസ്‌ആര്‍ടിസിയിക്ക് ഇളവുണ്ടെന്ന് ബസ് ജീവനക്കാര്‍ പറഞ്ഞെങ്കിലും കെഎസ്‌ആര്‍ടിസിയ്ക്ക് ഇളവില്ലെന്നാണ് ടോള്‍ പ്ലാസ അധികൃതര്‍ പറയുന്നത്. തൃശൂര്‍ പാലിയേക്കര ടോള്‍ പ്ലാസയിലും രാവിലെ ഗതാഗതക്കുരുക്ക് അനുഭവപ്പെട്ടു.
അതേസമയം, 2019 ജനുവരി ഒന്നിനാണ് രാജ്യത്ത് ഫാസ്ടാഗ് നടപ്പാക്കിയത്. കഴിഞ്ഞ ഡിസംബര്‍ ഒന്നുമുതല്‍ ഫാസ്ടാഗ് നിര്‍ബന്ധമാക്കുമെന്ന് കേന്ദ്രമറിയിച്ചെങ്കിലും ഫെബ്രുവരി 15 വരെ ഇളവ് നീട്ടി നല്‍കുകയായിരുന്നു. എന്നാല്‍, ഫാസ് ടാഗ് സംവിധാനത്തിലേക്ക് മാറാത്തവര്‍ ഇപ്പോഴും നിരവധിയാണ്. പഴയ വാഹനങ്ങള്‍ക്ക് ഫാസ്ടാഗെടുക്കാന്‍ ടോള്‍ പ്ലാസകളിലും 23 ബാങ്കുകളുടെ ശാഖകളിലും ഓണ്‍ലൈന്‍ പെയ്മെന്റ് ആപ്പുകളിലും സൗകര്യമുണ്ട്.
