0
0
തിരുവനന്തപുരം: മന്ത്രി കെ ടി ജലീലിന്റെ അടുപ്പക്കാരനെ സ്ഥിരപ്പെടുത്തുന്നതിനായി ന്യൂനപക്ഷ ക്ഷേമ വകുപ്പില്‍ നീക്കമെന്ന് ആരോപണം. ഇന്‍ഫര്‍മേഷന്‍ കം റിസര്‍ച്ച്‌ ഓഫീസര്‍ തസ്തികയില്‍ ഉള്‍പ്പെടെ നിലവില്‍ ഡെപ്യൂട്ടേഷനില്‍ ജോലി ചെയ്യുന്നവരെ സ്ഥിരപ്പെടുത്താന്‍ സ്‌പെഷ്യല്‍ റൂള്‍ പുറപ്പെടുവിച്ചു.
ഡയറക്ടര്‍, പ്രൊജക്‌ട് ഓഫീസര്‍, ഇന്‍ഫര്‍മേഷന്‍ കം റിസര്‍ച്ച്‌ ഓഫീസര്‍ തസ്തികകളില്‍ ഫെബ്രുവരി 11 നാണ് ഗസറ്റ് വിജ്ഞാപനം ഇറങ്ങിയത്. തസ്തികകള്‍ സ്ഥിരപ്പെടുത്തി നേരിട്ടുള്ള നിയമനത്തിന് സ്‌പെഷ്യല്‍ റൂള്‍ പുറപ്പെടുവിച്ചാണ് വിജ്ഞാപനം. എന്നാല്‍ ഇത് തസ്തികകളില്‍ നിലവില്‍ ഡെപ്യുട്ടേഷനില്‍ ജോലി ചെയ്യുന്നവരെ സ്ഥിരപ്പെടുത്താമെന്ന് വിജ്ഞാപനത്തിന്റെ അവസാന ഭാഗത്ത് പരാമര്‍ശിക്കുന്നുണ്ട്.
ന്യൂനപക്ഷ ക്ഷേമ വകുപ്പില്‍ നിലവില്‍ കരാറടിസ്ഥാനത്തില്‍ ജോലി ചെയ്യുന്നവരും ഡെപ്യൂട്ടേഷനില്‍ എത്തിയവരുമായവരെ സ്ഥിരപ്പെടുത്താന്‍ ഈ വിജ്ഞാപനത്തിലൂടെ കഴിയും. ഇന്‍ഫര്‍മേഷന്‍ കം റിസര്‍ച്ച്‌ ഓഫീസര്‍ തസ്തികയില്‍ നിലവില്‍ ജോലി ചെയ്യുന്നത് മന്ത്രി കെ ടി ജലീലിന്റെ അടുപ്പക്കാരനാണ്. 2018 ലാണ് കരാര്‍ അടിസ്ഥാനത്തില്‍ ഇയാള്‍ക്ക് നിയമനം നല്‍കുന്നത്. ഇയാളെ ഇപ്പോള്‍ സ്‌പെഷ്യല്‍ റൂള്‍ വഴി സ്ഥിരപ്പെടുത്താനാണ് അധികൃതരുടെ നീക്കമെന്നാണ് ഉയരുന്ന ആക്ഷേപം.
