നിയമസഭ പാസാക്കിയ ഒരു നിയമം മുഖ്യമന്ത്രി എങ്ങനെ പിന്‍വലിക്കുമെന്ന് മുസ് ലിം ലീഗ് ഉന്നതാധികാരസമിതി അംഗം എം.കെ മുനീര്‍.
സിഎഎ കേസുകള്‍ പിന്‍വലിക്കുമെന്ന് മുഖ്യമന്ത്രി നിയമസഭയില്‍ പറഞ്ഞതാണ് എന്നിട്ട് ഇതുവരെ പിന്‍വലിച്ചിട്ടില്ല. നിയമസഭയില്‍ പറഞ്ഞ ഉറപ്പുകള്‍ പാലിക്കാത്ത മുഖ്യമന്ത്രി പുറത്തു നല്‍കുന്ന ഉറപ്പുകള്‍ എങ്ങനെ വിശ്വസിക്കുമെന്നും അദ്ദേഹം ചോദിച്ചു.
വഖഫ് ബോര്‍ഡ് നിയമനം പിഎസ്‌സിക്ക് വിട്ട നിയമം നിയമസഭ പാസാക്കിയതാണ്. ഓര്‍ഡിനന്‍സ് സഭയില്‍ വന്നപ്പോള്‍ തന്നെ ഞങ്ങള്‍ അതിനെ എതിര്‍ത്തതാണ്. അതൊന്നും പരിഗണിക്കാതെ ബില്ല് പാസാക്കി ഗവര്‍ണര്‍ക്ക് അയച്ച ശേഷം പുറത്തിറങ്ങി അത് നടപ്പാക്കില്ലെന്ന് പറയുന്നതില്‍ എന്ത് വിശ്വാസ്യതയാണുള്ളതെന്ന് മുനീര്‍ ചോദിച്ചു. അങ്ങനെയാണെങ്കില്‍ നിയമസഭ പിരിച്ചുവിട്ട് പുറത്തുനിന്ന് കാര്യങ്ങള്‍ തീരുമാനിച്ചാല്‍ പോരേ എന്നും അദ്ദേഹം ചോദിച്ചു.
വഖഫ് ബോര്‍ഡ് വിഷയത്തില്‍ ലീഗ് ഉന്നയിച്ച എല്ലാ പ്രശ്‌നങ്ങളും ഇപ്പോഴും നിലനില്‍ക്കുന്നുണ്ട്. മുഖ്യമന്ത്രി നല്‍കിയ ഒരു ഉറപ്പും ഞങ്ങള്‍ വിശ്വാസത്തിലെടുക്കുന്നില്ല. ലീഗ് സ്വന്തമായി പ്രക്ഷോഭം തുടരും. മതസംഘടനകള്‍ക്ക് സ്വതന്ത്രമായി നിലപാട് സ്വീകരിക്കാന്‍ അവകാശമുണ്ട്. അതില്‍ ലീഗ് ഇടപെടില്ലെന്നും അദ്ദേഹം വ്യക്തമാക്കി.
മുസ്‌ലിം ലീഗ് എന്നും സമുദായ ഐക്യത്തിന് വേണ്ടി നിലകൊണ്ട പ്രസ്ഥാനമാണ്. ആദ്യം വിവിധ സമുദായങ്ങള്‍ക്കിടയിലും ഇപ്പോള്‍ സമുദായത്തിനകത്തും ഭിന്നതയുണ്ടാക്കാന്‍ ശ്രമിക്കുന്നത് ആരാണെന്ന് ജനങ്ങള്‍ക്കറിയാം. അറബ് ഭാഷക്ക് വേണ്ടി മൂന്ന് സഹോദരന്‍മാര്‍ രക്തസാക്ഷികളായ പ്രസ്ഥാനമാണ് മുസ്‌ലിം ലീഗ്. അന്ന് തീരുമാനം പിന്‍വലിപ്പിക്കാന്‍ ലീഗിന് കഴിഞ്ഞിട്ടുണ്ടെങ്കില്‍ ഈ തീരുമാനവും പിന്‍വലിപ്പിക്കുമെന്നും മുനീര്‍ പറഞ്ഞു.
